நீ பார்த்ததில்தானடி

நீ பார்த்ததில்தானடி
பைத்தியமானேன்..
உனைப் பார்த்திடத்தானடி
பத்தியமிருந்தேன்..

சிரித்தாயடி
நான் சிக்கிக் கொள்ளவே..
தவித்தேனடி
நான் தப்பிச் செல்லவே..

காதல் வானில் களித்தேன்..
உன் கண்ணில் என்னைத் தொலைத்தேன்..

அங்கேயும் இங்கேயும்
அரைப் பார்வை பார்த்தென்னை
முழுப் பார்வைக் - கிரையாக்கினாய்..

அலுங்காமல் குலுங்காமல்
அதிர்வொன்றும் நிகழாமல்
இதயத்தை இடமாற்றினாய்..

வாளைக்
கையோடு கொண்டே - நீ
போரிட்டால்
வீழ்த்திச் செல்வேனடி..

வளையல் கரத்தோடு
வந்தே - நீ
போரிட்டாய்
வீழ்ந்தே நின்றேனடி..

வெளியே வெளியே
என் உள்ளம் சொல்ல..
வழியேயின்றி
என் வாழ்க்கை செல்ல..
முடிவாய்ச் சொல் பெண்ணே
நான் என் செய்ய..

அதிகாலை வந்தாய் - நீ
அதனாலே கனவுக்கு
பரிவட்டம் தந்தேனடி..

நெடு நாளாய்
உறக்கத்தில் உழன்ற
என் கவிதைக்கு
ஒளிவட்டம் தந்தாயடி..

உன்னைப் பார்க்காத
வரைக்கும் - என்
முகத்திற்கு
சிரிப்பே தெரியாதடி..

உன் கண்கள்
பார்க்காத வரைக்கும் - என்
படைப்பிற்கு
பரிசே கிடையாதடி..

அழகின் அர்த்தம் - உன்
கண்கள் என்பேன்..
கொலையில் புத்தம் - உன்
கொள்கை என்பேன்..
சிறகோடு சிலுவையில்
அறைந்தால் - அதுதான்
காதல் என்பேன்..

- அரவிந்த் குமார். பா